Hali ya utulivu inaanza kurejea taratibu katika vijiji kadhaa vya eneo la Bapakombe-Pendekali, lililopo katika groupement ya Baswagha-Madiwe, wilayani Beni mkoani Kivu Kaskazini, wiki chache baada ya kupita kwa waasi wanaodaiwa kuwa wa kundi la ADF.

Taarifa hiyo imethibitishwa na Asasi za Kiraia za eneo hilo. Mwenyekiti wake, Claude Kapakasi, amesema kuwa hali ya usalama inaendelea kuimarika hatua kwa hatua, huku akiwataka wananchi kuendelea kuwa waangalifu na kuimarisha ushirikiano wao na vyombo vya usalama.

Kwa mujibu wake, kila mtu anapaswa kutoa taarifa mara moja kwa mamlaka husika kuhusu mienendo yoyote inayotia shaka ambayo inaweza kuhatarisha hali hiyo ya utulivu, ili kuzuia uwezekano wa mashambulizi mapya ya makundi yenye silaha.

Claude Kapakasi amewataka pia wakazi kuwa waangalifu wanapokutana na vitu vilivyoachwa ovyo, hususan vifaa vya chuma na chupa zinazotia shaka, ambavyo vinaweza kuwa na vilipuzi na hivyo kuhatarisha maisha ya wananchi.

Akipongeza juhudi za muungano wa majeshi ya FARDC-UPDF katika operesheni za kuimarisha usalama katika eneo hilo, kiongozi huyo wa Asasi za Kiraia amewahimiza wakazi wa vijiji ambavyo havikuathiriwa sana, hususan Malese, Central, Makusa pamoja na maeneo mengine ya jirani, kurejea taratibu katika makazi yao ili kuanza tena shughuli zao za kijamii na kiuchumi.

Hali hii ya utulivu inajitokeza wakati operesheni za kijeshi zinaendelea katika maeneo mbalimbali ya wilaya ya Beni kwa lengo la kudhibiti tishio linalotokana na waasi wa ADF.

Obady Madirisha