Marekani imechukua hatua rasmi. Jumatatu, tarehe 2 Machi, Washington ilitangaza kuiwekea vikwazo jeshi la Rwanda pamoja na maafisa wake wanne wa ngazi ya juu kwa tuhuma za kuhusika moja kwa moja katika mzozo unaoendelea mashariki mwa Jamhuri ya Kidemokrasia ya Kongo. Uamuzi huo ulitangazwa na Ofisi ya Udhibiti wa Mali za Kigeni (OFAC), chombo cha Marekani kinachosimamia udhibiti wa mali za kigeni.
Kwa mujibu wa mamlaka za Marekani, hatua hizo zinalenga kile kinachoelezwa kuwa ni msaada wa moja kwa moja wa kiutendaji uliotolewa na Kigali kwa kundi la waasi la M23 pamoja na washirika wake wanaoendesha shughuli zao mashariki mwa Kongo. Vikwazo hivyo vilikuwa vikitarajiwa kwa takribani miezi miwili. Kivitendo, hatua hiyo inahusisha kufungiwa kwa mali zozote zilizo ndani ya Marekani na kupigwa marufuku kwa miamala yoyote kati ya jeshi la Rwanda na raia au kampuni za Marekani.
Hata hivyo, imetolewa ruhusa ya muda kwa mikataba au shughuli zilizokuwa tayari zinaendelea, hadi tarehe 1 Aprili 2026.
Akizungumza kwa niaba ya Wizara ya Mambo ya Nje ya Marekani, Thomas Pigott alieleza kuwa uamuzi huo umechukuliwa katika muktadha wa matukio ya hivi karibuni uwanjani.
Siku chache baada ya kutiwa saini kwa makubaliano ya Washington, wapiganaji wa muungano wa AFC/M23 wanaodaiwa kuungwa mkono na Rwanda walichukua udhibiti wa mji wa Uvira, kitendo kilichotajwa kuwa ni ukiukwaji wa wazi wa makubaliano hayo. Kwa mujibu wake, mlolongo wa amri uliowezesha hatua hiyo umeiruhusu M23 kutwaa maeneo ya mamlaka ya Kongo na kuendeleza vitendo vya ukiukwaji.
“Hatua iliyotangazwa leo inaonesha azma ya Marekani kuhakikisha makubaliano ya Washington yanaheshimiwa,” alisema msemaji huyo, akiongeza kuwa Washington iko tayari kutumia nyenzo zote ilizo nazo kufanikisha hilo.
Upande wa Kigali, Rais Paul Kagame hapo awali alikanusha kuhusika kwa nchi yake katika mzozo huo. Mwanzoni mwa mwezi Februari, alisisitiza kuwa vita vinavyoendelea nchini DRC havikuanzishwa na Rwanda wala havikuanza kutoka katika ardhi yake.
Kuhusu suala la vikwazo, alieleza kuwa Rwanda haitaruhusu “ikandamizwe” navyo.
Nchini Kinshasa, mamlaka za Kongo zilitangaza shukrani zao za dhati kwa Marekani kupitia taarifa iliyotolewa Jumatatu jioni, zikisifu uamuzi huo kama ishara ya msaada wa kidiplomasia katika kukabiliana na hali ya usalama inayozidi kuwa tete mashariki mwa nchi.
Idara ya Uhariri