Msanii wa reggae kutoka Côte d’Ivoire, Tiken Jah Fakoly, ametoa wimbo mpya uitwao Mutamba. Kupitia tungo hii, msanii huyu mwenye msimamo wa kijamii na kisiasa anashutumu kile anachokiona kama dhuluma kubwa: hukumu ya waziri wa zamani wa Sheria wa Jamhuri ya Kidemokrasia ya Kongo, Constant Mutamba, aliyepewa kifungo cha miaka mitatu cha kazi ngumu kwa kosa la ubadhirifu wa fedha za umma.
Katika wimbo huu, Tiken Jah Fakoly haishii tu kulaani. Anaweka ulinganisho wa kipekee kati ya Constant Mutamba na Patrice Lumumba, shujaa wa kihistoria wa mapambano ya uhuru wa Kongo. Kwa mtazamo wake, kesi hii ni tishio kwa kumbukumbu ya mapambano ya haki na heshima barani Afrika.
Kesi ya Constant Mutamba, aliyehukumiwa Septemba iliyopita kwa ubadhirifu wa dola milioni 19, imezua mjadala mkali nchini DRC. Kwa Fakoly, uamuzi huu wa mahakama ni mfano wa “haki ya kuchagua,” inayowalenga baadhi ya wahusika huku ikiwapuuza wengine.
Kupitia Mutamba, msanii huyu anaendeleza utamaduni wake wa reggae wa kupinga dhuluma. Sauti yake nzito na mashairi makali ni sehemu ya harakati za kitamaduni na kisiasa za upinzani. Anakumbusha kuwa muziki unaweza kuwa silaha yenye nguvu ya kuamsha fikra na kuwakumbusha viongozi wajibu wao.
Wimbo umejengwa juu ya midundo ya reggae yenye mizizi ya kina, ukiwa na melodi ya kuvutia na yenye majonzi, na kubaki mwaminifu kwa mtindo wa Fakoly. Anachanganya hisia na mada ya kudai haki, akitoa kazi inayozidi burudani na kuwa tamko dhidi ya dhuluma.
Kwa kumlinganisha Mutamba na Lumumba, Tiken Jah Fakoly anataka kesi hii ionekane katika muktadha wa kihistoria. Anakumbusha kuwa mara nyingi viongozi wa kisiasa wa Kiafrika wanaothubutu kupinga mifumo iliyopo huwa wahanga wa ukandamizaji au kesi zenye utata.
Msimamo huu si salama kwa msanii. Baadhi ya wachambuzi wanaona kuwa Tiken Jah Fakoly anaweza kukosolewa kwa kumtetea mtu aliyehukumiwa kwa ufisadi. Lakini kwake, jambo la msingi ni kulaani mahakama inayotumika kisiasa.
Ujumbe wa Mutamba unaendeleza kazi ya Fakoly, ambaye daima hutumia muziki wake kuwatetea wanyonge na kulaani upotovu wa kisiasa barani Afrika. Msimamo wake umemletea heshima ya kimataifa, lakini pia maadui katika baadhi ya ngazi za mamlaka.
Akiwa mgeni Jumatano hii katika DW Afrique, Tiken Jah Fakoly atazungumzia sababu za kuandika wimbo huu na mapambano yake ya kudai haki sawa barani Afrika. Kupitia Mutamba, anakumbusha kuwa muziki unabaki kuwa silaha ya amani lakini yenye nguvu kubwa dhidi ya dhuluma.
Emmanuel Kasereka Bin Vikingi