Rais wa Marekani, Donald Trump, ametuma onyo kali kwa Iran, akisema kuwa jaribio lolote la kuvuruga usafirishaji wa meli katika Mlango wa Hormuz litajibiwa kwa “madhara mara ishirini zaidi” ya yale yaliyokwisha kutekelezwa, kwa mujibu wa RFI.  

Katika tamko la mtandaoni, alitishia kulenga miundombinu “rahisi kuharibu”, kiasi cha kufanya “Iran iwe karibu kushindwa kujijenga tena kama taifa.” Aliongeza: “Kifo, moto na ghadhabu vitatawala — lakini natumai, na ninaomba, kwamba hilo lisitokee!”

Takribani asilimia 20 ya mafuta ya dunia husafirishwa kupitia njia hii nyeti inayounganisha Ghuba ya Uajemi na masoko ya kimataifa. Msukosuko unaoongezeka tayari umepunguza kiwango cha usafirishaji wa baharini, na hivyo kuongeza mabadiliko ya bei na kuchochea kupanda kwa gharama, RFI inasisitiza.

Masoko ya mafuta yalijibu mara moja kwa matamshi ya rais. Jumanne asubuhi barani Asia, bei ya Brent ilishuka kwa asilimia 8.5, hadi dola 92.50 kwa pipa, huku mafuta ghafi ya Marekani yakiporomoka karibu asilimia 9, hadi dola 88.60.

Licha ya kushuka huko, bei bado ziko juu kwa takribani asilimia 30 ikilinganishwa na hali kabla ya mgogoro, ishara ya kuendelea kwa hofu na athari za kudumu za mvutano wa kisiasa.

Donald Trump hata hivyo alidokeza kuwa vita “vinaweza kuisha hivi karibuni,” kauli iliyosaidia kupunguza hofu ya masoko, ingawa haikuondoa wasiwasi wa kuzidi kwa mzozo.

Kati ya vitisho vya uharibifu na wito wa utulivu, jumuiya ya kimataifa inasubiri kwa tahadhari hatua zinazofuata za kidiplomasia na kijeshi katika eneo hili nyeti, ambako usalama wa nishati ya dunia unachezewa karata ya hatari, RFI inahitimisha.

Emmanuel kasereka Bin Vikingi