Kadiri vita vya Ukraine vinavyoingia mwaka wa nne, Rais wa Marekani Donald Trump ametangaza kuwa makubaliano ya amani na Moscow yako “karibu kupatikana.” Hata hivyo, mazungumzo yake na Volodymyr Zelenskyy pamoja na Vladimir Putin yanaendelea kufichua tofauti kubwa, hasa kuhusu maeneo yaliyokaliwa na kuhusu dhamana za usalama kwa Kiev.  

Trump, akizungumza kutoka makazi yake ya Florida alipomkaribisha Rais wa Ukraine Volodymyr Zelenskyy, alisisitiza kuwa Ukraine na Urusi ziko karibu kufikia makubaliano ya amani. Lakini, licha ya matumaini hayo, alikiri kuwa mazungumzo bado ni magumu na huenda yakashindikana, jambo ambalo lingeendeleza mzozo huu uliodumu kwa takribani miaka minne.

Kauli hizi zilitolewa baada ya mkutano kati ya Trump na Zelenskyy, ukifuatiwa na mazungumzo marefu ya saa mbili na nusu kati ya Trump na Rais wa Urusi, Vladimir Putin. Trump alieleza kuwa mazungumzo hayo yalikuwa “ya kirafiki,” akisisitiza imani yake kwamba Putin bado anatamani amani.

Hata hivyo, Urusi imezidisha mashambulizi yake ya kijeshi dhidi ya Ukraine wakati huohuo Zelenskyy akielekea Marekani kuhuisha mazungumzo ya amani. Mkanganyiko huu unaonyesha ugumu wa mazungumzo na udhaifu wa matarajio ya amani.

Vikwazo vikuu bado vipo. Hatima ya maeneo ya Ukraine yaliyoko chini ya udhibiti wa Urusi ni suala nyeti. Vilevile, Kiev inataka dhamana thabiti za usalama ili kuepusha uvamizi mwingine siku za usoni.

Masuala haya yanabaki kuwa vizuizi vikubwa kwa makubaliano ya kudumu. Viongozi wote wawili wamekubali kuwa tofauti hizi zinaweza kurefusha mazungumzo na kuchelewesha matumaini ya amani halisi.

Baada ya mazungumzo yao, Trump na Zelenskyy walifanya mawasiliano na viongozi kadhaa wa Ulaya, akiwemo Ursula von der Leyen, Rais wa Tume ya Ulaya, pamoja na wakuu wa nchi za Finlandi, Ufaransa, Ujerumani, Uingereza na Poland.

Mashauriano haya yanalenga kushirikisha washirika wa Ulaya katika juhudi za upatanisho na kuongeza uhalali wa makubaliano yanayoweza kufikiwa, kwa matumaini ya kukomesha mzozo ambao unaendelea kutikisa uwiano wa kikanda na wa kimataifa.

Emmanuel Kasereka bin Vikingi