Jumamosi tarehe 8 Novemba 2025, hoteli ya Cap Kivu mjini Goma iligeuka kuwa jukwaa la mkutano wa kipekee wa kidini uliohusu kaulimbiu Kuthubutu amani. Tukio hili lililoandaliwa na jumuiya ya Sant’Egidio liliwaleta pamoja viongozi wa dini mbalimbali—Waislamu, Wakatoliki, Waorthodoksi na Waanglikana—pamoja na vijana, watoto na wazee, wote wakiwa na azma ya kujenga mustakabali wa undugu na mshikamano.

Hotuba zilizotolewa zilisistiza umuhimu wa kugeuza wapinzani kuwa ndugu, kuweka mbele maslahi ya pamoja, na kutanguliza heshima ya utu wa binadamu. Amani ilielezwa kuwa ni nguvu ya kimungu, chaguo la maisha, na jukumu la kila mmoja kwa unyenyekevu na uendelevu.

Mtoto mmoja kutoka Sant’Egidio alitamka kwa msisimko: “Kuthubutu amani ni kuitaka amani, ni kuijenga amani, na ni kuishi amani.” Ujumbe huu ulitafsiriwa kama mwito wa kuchukua hatua kwa kila mshiriki, bila kujali imani au dhehebu.

Viongozi wa kidini walitia saini tamko rasmi la amani, wakidhihirisha nia yao ya pamoja ya kuendeleza mazungumzo kama njia ya msingi ya maridhiano. Baada ya hapo, chakula cha undugu kilishirikiwa, kama ishara ya umoja na maelewano.

Bi Aline Menane, kiongozi wa Sant’Egidio mjini Goma, alisifu mkusanyiko huo kwa kusema: “Tukio hili limewaleta pamoja wanaume, wanawake, vijana na viongozi wa kidini kusikiliza ujumbe unaotia moyo na matumaini.” Alisisitiza haja ya kuendeleza mikutano kama hii ili kuendeleza mwanga wa amani.

Jumuiya ya Sant’Egidio imejengwa juu ya nguzo tatu—sala, maskini, amani—na mkutano huo ulifungwa kwa sala ya pamoja, ikiwa ni mwaliko kwa jamii kuendelea kuomba amani na kuifanya kuwa sehemu ya maisha ya kila siku.

Mkutano huu umeonyesha kuwa amani ni mradi wa wote, kama alivyosema Mtakatifu Yohane Paulo wa Pili. Pia umeonesha kuwa dunia inakosa pumzi bila mazungumzo, na kila sauti ina mchango katika kuijenga amani ya kudumu.

Emmanuel Kasereka Bin Vikingi