Mwanahabari Jovial Kakule Muvunga wa Radio Télé Communautaire Babombi (RTCB), yenye makao yake Biakato, makao makuu ya chefferie ya Babila-Babombi, katika eneo la Mambasa, mkoani Ituri, ameishi kwa siku mbili sasa mafichoni baada ya kupokea vitisho vya kuuawa.
Kwa mujibu wa Ram’s Malikidogo wa APDEF Mambasa, vitisho hivyo vinatoka kwenye namba ya simu isiyojulikana, inayodaiwa kumilikiwa na kundi ambalo utambulisho wake bado haujafahamika hadi sasa.
Chanzo hicho kinaeleza kuwa ujumbe uliotumwa kwa mwanahabari huyo ulikuwa na vitisho vya moja kwa moja, pamoja na taarifa za kina kuhusu makazi yake, mahali anapofanyia kazi na wanafamilia wake.
«“Tunajua anakoishi, tunajua makazi yake, tunajua mahali anapofanyia kazi, tunajua familia yake yote,” anasema Ram’s Malikidogo, akinukuu yaliyokuwa kwenye ujumbe alioupokea mwanahabari huyo.»
Kutokana na vitisho hivyo, Jovial Kakule Muvunga amelazimika kujificha na kuishi mafichoni, akihofia usalama wa maisha yake.
Ram’s Malikidogo anatoa wito kwa mamlaka husika kuanzisha uchunguzi ili kubaini waandishi wa vitisho hivyo na kuhakikisha usalama wa mwanahabari huyo.
«“Tunatoa wito wa dhati kwa mamlaka zote husika kufanya uchunguzi wa kina ili kuwabaini na kuwakamata watu hawa, kundi hili linalotaka kuhatarisha usalama wa mwenzetu, mwanahabari Kakule Joviale Muvunga,” amesema.»
Mwanaharakati huyo wa kiraia pia anauomba Ofisi ya Pamoja ya Umoja wa Mataifa ya Haki za Kibinadamu (BCNUDH) kujihusisha na juhudi za kumlinda mwanahabari huyo.
Kwa sasa, waandishi wa vitisho hivyo pamoja na sababu zilizowasukuma kutoa vitisho hivyo bado hazijabainishwa rasmi. Aidha, hakuna taarifa ya kukamatwa kwa mtu yeyote kuhusiana na tukio hili.
Elvine Malimbo