Asasi za kiraia za Forces Vives katika sekta ya Bapere zimezitaka mamlaka za kisiasa na kiutawala kuchukua hatua za haraka ili kukabiliana na mafuriko yanayoikumba kituo cha kibiashara cha Manguredjipa, makao makuu ya sekta ya Bapere, wilayani Lubero, mkoani Kivu Kaskazini.

Wito huo ulitolewa Jumapili, tarehe 2 Agosti 2026, kufuatia mvua kubwa iliyonyesha siku moja kabla na kusababisha mafuriko makubwa katika eneo hilo. Kwa mujibu wa asasi hiyo, maji yalifurika katika sehemu mbalimbali za kituo hicho cha biashara na kusababisha uharibifu wa mali za wakazi pamoja na wafanyabiashara.

Kwa mujibu wa viongozi wa asasi za kiraia, hali hiyo inaweza kuathiri maisha ya kijamii na kiuchumi ya eneo hilo, hasa kutokana na kusimama au kuvurugika kwa shughuli za biashara katika mojawapo ya vituo muhimu vya biashara vya sekta ya Bapere.

Rais wa Forces Vives wa sekta ya Bapere, Kakule Kagheni, amewataka wakazi wanaoishi karibu na mito ya Mutokolea na Lenda, inayopita katikati ya Manguredjipa, kuwa waangalifu kutokana na hatari ya kuongezeka kwa kina cha maji, hasa katika kipindi hiki cha mvua nyingi.

Pia amezitaka mamlaka za kisiasa na kiutawala kuitisha haraka kikao cha dharura kitakachowakutanisha wataalamu wa huduma husika pamoja na wawakilishi wa jamii ili kutathmini hali hiyo, kubaini hatua za muda mfupi na kuweka mikakati ya kudumu ya kupunguza athari za mafuriko yanayojirudia mara kwa mara.

Asasi za kiraia za Forces Vives zinaamini kuwa hatua za haraka zitasaidia kupunguza uharibifu unaosababishwa na mvua kubwa, kulinda shughuli za kiuchumi na kuhakikisha usalama wa wakazi wanaoishi katika maeneo yaliyo hatarini.

Obady Madirisha na Abel Tsongo