Katika maadhimisho ya Siku ya 40 ya Vijana Duniani, iliyofanyika Jumapili mjini Kinshasa, Kardinali Fridolin Ambongo alitoa wito wenye nguvu kwa vijana wa Kongo: wajikomboe kutoka hofu na kukata tamaa, ili wawe mashuhuda hai wa Kristo na wachukuzi wa upya katika Kanisa na jamii.

Sherehe ya mwaka huu, iliyopewa kauli mbiu na Papa Leon XIV — “Amka, simama na uwe shahidi wa Kristo aliye hai” — iliambatana na ibada ya ekaristi katika viwanja vya Ikulu ya Taifa, makao ya Bunge la Kongo.

Katika mahubiri yake, Kardinali Ambongo alisisitiza umuhimu wa vijana kuvunja usingizi wa hofu, kukata tamaa na mazoea ya kujisalimisha. Kwa mujibu wake, kuwa Mkristo leo kunamaanisha “kumfanya Kristo atawale maisha yako kwa matendo halisi.”

Kiongozi huyo wa Kanisa alikumbusha kwamba vijana wameitwa kuwa wachukuzi wa mwanga na upya, si tu katika jumuiya zao na Kanisa, bali pia katika taifa zima. Wito huu unakuja katika mazingira ambamo vijana wa Kongo wanakabiliana na changamoto nyingi za kijamii, kiuchumi na kisiasa.

Sherehe ya kijimbo ya vijana, iliyofanyika katika sehemu ya kaskazini ya Kinshasa, iliwakusanya mamia ya waamini, ikidhihirisha uhai wa vijana Wakristo na nafasi yao ya msingi katika mustakabali wa taifa.

Kupitia ujumbe huu, Kardinali Ambongo ameungana na mwito wa Papa Leon XIV, akiwataka vijana wa Kongo wasimame kama nguvu ya mageuzi ya kiroho na kijamii, wakimshuhudia Kristo aliye hai kwa kujitoa katika huduma ya Kanisa na ya nchi.

Emmanuel Kasereka bin Vikingi