Wakati Jamhuri ya Kidemokrasia ya Kongo ikiendelea na juhudi za kudhibiti mlipuko mpya wa ugonjwa wa Ebola katika mkoa wa Ituri, timu za kukabiliana na ugonjwa huo bado zinakabiliwa na changamoto kubwa za kiutendaji. Upinzani kutoka kwa baadhi ya jamii, ukosefu wa utulivu wa kiusalama, uhaba wa vifaa na pembejeo za matibabu pamoja na uwezo mdogo wa kutenga wagonjwa ni miongoni mwa vikwazo vinavyozuia ufanisi wa shughuli za kukabiliana na ugonjwa huo, hasa katika maeneo yaliyoathirika zaidi kama Rwampara, kijiji kilichopo takriban kilomita kumi kutoka mji wa Bunia.

Kwa mujibu wa taarifa zilizochapishwa na Mongabay na kutumiwa na Beroyafm.net kama chanzo cha taarifa, Dkt. Lufungula, msimamizi wa operesheni za kukabiliana na Ebola, amesema mamlaka za afya zimeboresha mkakati wa mawasiliano ili kuongeza ushiriki wa wananchi. Ujumbe wa uhamasishaji sasa unatafsiriwa katika lugha za wenyeji na kusambazwa kwa ushirikiano na viongozi wa dini, viongozi wa kimila na viongozi wengine wa jamii wanaochukuliwa kuwa nguzo muhimu katika kujenga imani ya wananchi.

Kwa mujibu wa taarifa hizo zilizochapishwa na Mongabay na kurejelewa na Beroyafm.net, juhudi za kukabiliana na mlipuko huo pia zimepata mafanikio kadhaa muhimu. Mamlaka za afya zinaripoti kuwa vituo 23 vya matibabu ya Ebola vimejengwa katika maeneo yaliyoathirika, maabara za simu zimeanzishwa kwa ajili ya kugundua wagonjwa mapema, na magari ya wagonjwa (ambulensi) yamesambazwa katika vituo vya afya ili kuboresha huduma kwa wagonjwa.

Akiwa katika ziara ya kutathmini operesheni za kukabiliana na Ebola mjini Bunia tarehe 23 Julai 2026, Waziri Mkuu Judith Suminwa Tuluka alipongeza hatua zilizokwisha kufikiwa. Akinukuliwa na Mongabay na taarifa hiyo kuchapishwa pia na Beroyafm.net, Waziri Mkuu alisema kazi kubwa tayari imefanyika, lakini akasisitiza umuhimu wa kuharakisha upatikanaji wa vifaa vilivyobaki, kuimarisha uhamasishaji wa jamii na kuhakikisha mazishi salama na yenye heshima ili kupunguza hatari ya kuenea kwa virusi.

Kwa wataalamu wa afya ya umma, mlipuko huu mpya unaonyesha umuhimu wa kuimarisha uwezo wa taifa katika kujiandaa na kukabiliana na dharura za kiafya. Akizungumza na Mongabay, Dkt. Rodriguez Kisando, mtaalamu wa afya na mazingira kutoka DRC, amesema kuwa janga hili linapaswa kuwa somo la kuimarisha maandalizi dhidi ya majanga mengine ya kiafya yanayoweza kujitokeza siku zijazo.

Licha ya mafanikio yaliyopatikana, mamlaka za afya zinakiri kuwa kudhibiti kabisa mlipuko huu kutategemea si tu upatikanaji wa vifaa na rasilimali, bali pia ushirikiano wa wananchi. Katika mazingira ambayo bado yanakabiliwa na changamoto za kiusalama katika sehemu mbalimbali za Ituri, kujenga imani kati ya jamii na timu za afya kunabaki kuwa msingi muhimu wa kukomesha maambukizi ya Ebola na kuimarisha ustahimilivu wa mfumo wa afya nchini.

Emmanuel Kasereka bin Vikingi