Rais wa Burkina Faso, Kapteni Ibrahim Traoré, aliongoza Alhamisi 27 Agosti 2026 katika Uwanja wa 4-Agosti hafla rasmi ya kufunga awamu ya pili ya Mpango wa Lazima wa Mafunzo ya Uzalendo (IPO). Mafunzo hayo yaliyodumu kwa siku 30 katika maeneo mbalimbali nchini yaliwakutanisha washiriki 65,000, ambao sasa wanatajwa kuwa mabalozi wa uzalendo na wamejitolea kulitumikia Taifa.
Katika hotuba yake, mkuu wa nchi aliwapongeza washiriki kwa muda walioutumia katika mafunzo hayo, ambayo aliyataja kuwa « shule ya maisha ». Akiunganisha mpango huo na mfumo wa Mapinduzi ya Maendeleo ya Wananchi (RPP), Ibrahim Traoré alisisitiza umuhimu wa kuwa na raia « wanaoamini » na « waliojitolea », wenye uwezo wa kushiriki kikamilifu katika maendeleo ya nchi.
Rais wa Burkina Faso aliwataka washiriki hasa kukuza unyenyekevu, hususan katika kujifunza na kuelewa hali halisi ya kitaifa na kimataifa. Aliwahimiza kutafuta maarifa kuhusu mazingira yao, maumbile na masuala ya kijiografia na kisiasa duniani, akieleza kwamba ujinga unaweza kuwa tishio kwa mchakato wa kimapinduzi unaoendelea nchini humo.
Mshikamano pia ulikuwa miongoni mwa mambo muhimu katika ujumbe wa rais. Ibrahim Traoré alikumbusha kwamba mshikamano ni moja ya tunu za msingi zinazopaswa kuwa sehemu ya maisha ya kila mzalendo. Aidha, aliwahimiza vijana kutanguliza uwajibikaji, huku akiwataka kuwa na ujasiri na uwezo wa kujishinda wanapokabili changamoto zinazoikabili Burkina Faso.
Mkuu wa nchi pia aliwaonya washiriki dhidi ya kutafuta « njia za mkato » na urahisi, akisema kwamba mwenendo huo unaweza kuwapeleka katika usaliti. Aliwahimiza kujiepusha na udanganyifu na uongo, na badala yake kuhifadhi heshima, utu na maadili mema. Kwa upande wake, Kanali Daba Naon, mwenyekiti wa Uratibu wa Kitaifa wa Uandaaji na Ufuatiliaji wa IPO, alisema siku 30 za mafunzo hayo zimewezesha kujenga vijana wanaotambua wajibu wao na walio tayari kulitumikia Taifa.
Kwa niaba ya washiriki, Roxanne Tiendrébéogo alimshukuru Rais wa Faso kwa uzoefu huo alioueleza kuwa wa kipekee, uliowapa nafasi ya kupata mafunzo, kutafakari na kujijenga upya binafsi. Aliahidi kwa niaba ya wenzake kuimarisha azma yao na kulitumikia Taifa kwa kujitolea na uwajibikaji, akisisitiza kwamba kukamilika kwa mafunzo hayo kunapaswa kuwa mwanzo wa safari ya kujitolea kwa uzalendo wa kudumu.
Katika hafla hiyo, Ibrahim Traoré pia alitangaza mpango wa kuanzishwa hivi karibuni kwa Vituo vya Kitaifa vya Mafunzo ya Uzalendo katika maeneo mbalimbali nchini, ambavyo vitakuwa wazi kwa wananchi wote. Tangazo hilo lilipokelewa kwa shangwe kubwa na umati uliohudhuria hafla katika Uwanja wa 4-Agosti, likidhihirisha azma ya mamlaka ya kuendeleza na kupanua mpango wa mafunzo ya uzalendo zaidi ya awamu zinazolazimishwa.
Emmanuel Kasereka bin Vikingi