Huduma za usalama za Burkina Faso zimethibitisha kuwa zimefanikiwa kuzuia jaribio la mauaji lililolenga kiongozi wa taifa, Kapteni Ibrahim Traoré. Mpango huo, unaodaiwa kuandaliwa na aliyekuwa kiongozi wa kijeshi, Luteni Kanali Paul Henri Damiba, na kuungwa mkono na taifa jirani, ulikusudia kupiga moyo wa mamlaka.  

Waziri wa Usalama, Mahamadou Sana, katika tamko lake kwa umma, alieleza kuwa vyombo vya ulinzi na ujasusi vilivumbua njama hiyo “katika saa zake za mwisho za maandalizi”, na hivyo kuzuia utekelezaji wake. Washambuliaji walipanga kumuua rais kabla ya kushambulia taasisi nyeti na viongozi wa kiraia.

Taarifa rasmi inamtaja Luteni Kanali Paul Henri Damiba, aliyepinduliwa na Traoré mnamo Septemba 2022, kuwa ndiye msukumo wa njama hiyo. Waziri pia aligusia ufadhili kutoka nje, ukitoka katika taifa jirani, ingawa hakulitaja moja kwa moja.

Hadi sasa, Damiba wala taifa linalodaiwa kuhusika hawajatoa kauli yoyote hadharani. Ukimya huu unazidisha hali ya wasiwasi na sintofahamu katika eneo hilo.

Tangu aingie madarakani, Kapteni Ibrahim Traoré tayari ameshanusurika katika majaribio mawili ya mapinduzi. Tukio hili jipya linakuwa la tatu, likidhihirisha udhaifu wa kisiasa na kiusalama wa taifa hilo.

Wakati huohuo, kapteni anaendelea na mapambano makali dhidi ya makundi yenye silaha ambayo yamesababisha mamilioni ya raia wa Burkina Faso kuyahama makazi yao, na hivyo kuongeza ukubwa wa janga la kibinadamu.

Pamoja na changamoto hizi na taswira yake ya kiongozi mkali, Traoré mwenye umri wa miaka 37 anaungwa mkono kwa wingi na wananchi. Hotuba zake za kupigania umoja wa Afrika na ukosoaji wake wa sera za mataifa ya Magharibi zinavuka mipaka ya Burkina Faso na kuwavutia wengi. Kwa mujibu wa taarifa za BBC, umaarufu huu unaonyesha upeo wa ujumbe wake na umakini wa mamlaka mbele ya vitisho vinavyoendelea.

Emmanuel Kasereka bin Vikingi