Sehemu mpya ya msukosuko wa mpito wa Burkina Faso imeibuka: aliyekuwa rais wa mpito, Paul-Henri Sandaogo Damiba, aliyekuwa amejificha nchini Togo tangu kupinduliwa kwake Oktoba 2022, amekamatwa na kufukuzwa. Serikali ya Ouagadougou inamshutumu kwa kuandaa jaribio jipya la mapinduzi dhidi ya utawala wa kapteni Ibrahim Traoré.  

 Luteni Kanali Paul-Henri Sandaogo Damiba, aliyewahi kushika hatamu za Mpito wa Burkina Faso, alikamatwa mjini Lomé, ambako aliishi uhamishoni kwa zaidi ya miaka mitatu. Anguko lake la Oktoba 2022, lililosababishwa na kapteni Traoré, lilimlazimisha kutafuta hifadhi nchini Togo.

 Kwa mujibu wa taarifa zilizokusanywa na Radio France Internationale (RFI), Damiba alikamatwa Ijumaa tarehe 16 Januari katika makazi yake ya kifahari yaliyoko Lomé 2. Baadaye alipelekwa mbele ya Mahakama ya Rufaa, ambapo jaji alikubali ombi la uhamisho lililotolewa na mamlaka za Burkina Faso.

 Vitu vyake binafsi vilikusanywa katika eneo la kifahari la “Six Villas”, sehemu inayolindwa kwa ulinzi mkali katikati ya mji mkuu wa Togo. Hapo Damiba aliishi chini ya uangalizi wa karibu, bila uhuru wa kweli wa kutembea.

 Akiwa ameandamana na wanajeshi, aliyekuwa kiongozi wa Mpito alihamishwa hadi uwanja wa ndege wa Lomé Jumamosi tarehe 17 Januari. Hata hivyo, hatima yake ya mwisho haijulikani, kwani hakuna taarifa rasmi zilizotolewa na serikali ya Togo wala ile ya Burkina Faso.

 Uhamisho huu unazidisha hoja inayotetewa na Ouagadougou: kwamba Damiba alijaribu kufufua njama mpya ya kupindua utawala wa kapteni Ibrahim Traoré.

Mapinduzi ya karibuni yanayodaiwa, kwa mujibu wa mamlaka za Burkina Faso, yalizimwa tarehe 3 Januari. Damiba mara kwa mara amekuwa akishtakiwa na jemedari wa sasa kwa kutaka kurejea madarakani kwa nguvu.

 Hadi sasa, hakuna tamko rasmi lililotolewa na serikali ya Togo wala Burkina Faso kuhusu kukamatwa kwake au mahali alipopelekwa. Tukio hili limefunikwa na pazia la fumbo, likizidisha uvumi na mashaka kuhusu mustakabali wa kisiasa wa Damiba.

Emmanuel Kasereka bin Vikingi