Jeshi la Polisi la Taifa la Kongo (PNC) sasa limeweka masharti makali ya usimamizi wa makundi ya mifugo katika mji wa mpakani wa Kasindi.

Hatua hiyo inalenga kupunguza ajali za barabarani zinazosababishwa na mifugo inayoingizwa kutoka Uganda na kusafirishwa kupitia barabara za Kasindi.

Kwa mujibu wa Kamishna Mkuu Kasereka Kambere Claude, Kamanda wa PNC mjini Kasindi, hakuna kundi la mifugo litakaloruhusiwa kupita barabarani bila kuwa na idadi ya kutosha ya wachungaji wa mifugo (bouviers) wenye uwezo wa kuidhibiti.

Lengo ni kuhakikisha mifugo hiyo haisababishi usumbufu kwa watumiaji wa barabara, hasa katika eneo la katikati ya mji wa Kasindi ambako msongamano wa magari na watu ni mkubwa.

Uamuzi huo umechukuliwa kufuatia ongezeko la ajali za barabarani zilizohusisha mifugo, ambazo baadhi zimesababisha vifo pamoja na uharibifu mkubwa wa mali.

PNC imeeleza kuwa hatua hiyo inazingatia Kifungu cha 49 cha Kanuni Mpya ya Barabara, kinachowataka waendeshaji na wasindikizaji wa mifugo kubaki karibu na wanyama wao ili kuzuia usumbufu au ajali barabarani.

Jeshi la Polisi limetoa wito kwa wafanyabiashara na wasafirishaji wa mifugo katika mpaka wa Kasindi kuheshimu masharti hayo, likionya kwamba watakaokiuka watachukuliwa hatua kwa mujibu wa sheria. Idadi kubwa ya ng’ombe, mbuzi na kondoo hao husafirishwa kuelekea miji ya Beni, Oicha na Butembo.

La Reine Aminata Kitambala